足球迷每年都買嘅「 DLC」遊戲《FIFA 20》即將於9月27日推出，日前 EA Sports 介紹咗唔少玩家期待嘅 Career Mode 新改動！今次玩家可以為 Career Mode 內嘅經理人進行個人化設定，包括樣貌、髮型、膚色及衣著等，同時《FIFA 20》亦首次加入咗女性經理人選項。

《FIFA 20》日前公布咗 Career Mode 嘅新改動，首次加入咗經理人性別選擇，令玩家可以使用女性經理人。此外，經理人嘅設定亦進一步個人化，玩家可以好似設定球員咁，為經理人設定面型、膚色、樣貌細節、衣著及裝飾物等。而經理人於 Career Mode 內與球員嘅單獨對話，記者會上嘅反應、球隊表現等各項資訊都會有全新動畫演釋，而以上唔同嘅因素都會運算出唔同嘅新聞頭條；而經理人唔同嘅說話、行動，對球員嘅出場安排、調動都會影響球隊士氣，令遊戲更加真實。

此外，Career Mode 中嘅球員潛力會隨住球員表現而改變，若某假如青訓於主隊表現好，以及取得多個入球，佢嘅 能力值發展會更快，而臨近退休嘅球員表現出色，會令佢有延遲掛靴嘅決定。最後，EA Sports 表示佢哋仲改善緊 Career Mode 嘅聯賽品牌，即係話玩家未會見到更多嚟自英超、德甲、法甲、西甲、MLS，甚至係歐洲冠軍聯賽及歐洲聯賽嘅標誌。

來源：Engadget