新一季英超唔經唔覺已經開始左，但係相信暫時大家未有太大興趣去睇去理，不過久唔久比自己放鬆下，先可以走更遠嘅路。

現時作為球賽評述員嘅摩連奴，較早前就被問到今季英超邊一隊有機會爭冠，而佢比嘅答案前三分別係：曼城、熱刺及利物浦，而第四卻竟然爆出：曼城B隊！

能夠講出曼城B隊竟然比曼聯、車路士、阿仙奴更有機會奪冠，究竟呢隊波勁成點？

首先，曼城嘅正選陣容如下：

門將：艾達臣

後衛：獲加、拿樸迪、史東斯、辛真高

中場：迪布尼、費南甸奴、大衛施華

前場：B施華、阿古路、史達寧

曼城正選陣容基本上粒粒皆星，攻守平衡，所以係奪標熱門絕對合情合理。但當然要想喺英超奪冠，後備陣容亦都非常重要，因為擁有足夠實力嘅球員進行輪換，可以有效地令正選球員獲得足夠休息，以便行得更遠。

以下就係曼城嘅後備陣容：

門將：巴禾（225萬英鎊）

後衛：簡斯路（4950萬）、奧達文迪（2250萬）、加西亞（270萬）、文迪（3150萬）

中場：洛迪高（7200萬）、根度簡（4500萬）、科頓（2250萬）

前場：馬列斯（5400萬）、捷西斯（6300萬）、辛尼（9000萬）

可以睇到曼城B隊嘅陣容不乏球星，好似辛尼、捷西斯、洛迪高、根度簡等等，而佢地呢套陣容合計嘅估值亦達到4.55億鎊，絕對比絕大部份球隊都要高得多。即使完全派上呢班後備兵，其餘19支英超球隊相信都無一支可以100%肯定覺得自己可以擊敗到佢地。

擁有呢兩套陣容，曼城喺作為長途賽嘅英超可以話擁有絕對優勢，同時亦都可以增加佢地喺歐聯行得更遠嘅本錢。而呢一切，說明了其實都係金錢嘅力量，因為曼城背後嘅金主基本上可以話係無限金錢的。