身家過億嘅富豪們生活，對於我地呢班星斗小市民黎講，相信都係我地高不可攀嘅位置，亦都難以理解佢地可以點樣奢華生活。不過，原來富豪們都會有唔明白有關金錢上嘅野，即使佢嘅身家已經超過15億美元！

唔知各位球迷仲記唔記得，2014年快艇原來嘅老闆Sterling因為一個電話內容含有種族歧視言論，最終被NBA判罰終身禁賽，並罰款250萬美元。其後一大波輿論攻勢令Sterling被迫賣掉快艇，而接手嘅係前微軟CEO Ballmer。

當時Ballmer以20億美元全面收購Sterling嘅快艇，以當時黎講呢個已經接近係天價交易，所以Sterling雖然係被迫，但都叫做真係賺左一大舊錢走人，要知道佢係喺1981年以1250萬美元收購快艇的，當時嘅快艇仲叫做聖地牙哥快艇。

不過近日有人透露一件小插曲有關當日Ballmer向Sterling收購快艇的，而呢件事亦都令人知道原來世界真係一山還有一山高的。

據消息知，當日Ballmer要收購快艇，Sterling對於Ballmer是否擁有20億美元現金作出質疑，因為佢覺得就算有錢都會拎左黎投資，而唔會有20億美元就咁放喺度。不過Ballmer就向Sterling非常肯定表示：「唔使擔心，我有20億美元現金，而家我打個電話比銀行，等佢地幫你確認一下。」當時Sterling仲以為Ballmer講笑，佢竟然向Ballmer暗嘲：「呢個係我一生人中聽過最愚蠢嘅笑話。」Ballmer當時真係黑人問號，完全唔明Sterling嘅意思。

Sterling繼續表示：「點會有人會拎住20億美元現金而唔拎去投資？如果真係有咁多現金喺手就真係太蠢了。」

最後Ballmer當然真係可以拎得出20億美元現金向Sterling全面收購快艇，並喺今年成功搶得Kawhi Leonard及Paul George兩位巨星，黎緊一季將會喺總冠軍嘅大熱門之一。

其實當日Sterling唔明白Ballmer點解會擁有咁多現金都好正常，因為2014年嘅時候，Sterling身家就只有19億美元，但係Ballmer則擁有193億美元，排名全球富豪第37位。而黎到今日，Sterling身家雖然增至36億美元，但係Ballmer則已經升至513億美元，排名全球富豪第19位。所以，Sterling對於Ballmer黎講其實都真係一個死窮鬼黎咋！