現役成就最高嘅足球員，相信都係不下C朗拿度及美斯二人，兩位球員都曾經5奪金球獎，而球會成就亦都無現役球員可以相提並論，其中C朗喺國家隊層面就比美斯更加好，因為佢曾帶領葡萄牙奪得歐國盃冠軍及較早前歐國聯冠軍。

不過，作為運動員總係會有退役嘅一刻，現年34歲嘅C朗雖然近年仍然保持極高嘅競技狀態，但其掛靴問題始終都係唔少球迷關心嘅事。對此，C朗亦正面回應：「我其實無諗問(退役)呢個問題，或者我明年就會退役，但我亦都可能踢至40-41歲。」

「退役一事我唔知道，我總係講我很享受現在嘅時刻。上天給我的禮物很好，我會繼續去享受。」

如果要數C朗獲得過嘅所有榮譽，相信數到聽朝都未數完，而如果單計大賽錦標，佢就曾經拎過5次歐聯冠軍、3次英超冠軍、2次西甲冠軍、1次意甲冠軍、4次世冠盃冠軍、1次歐國盃冠軍、1次歐國聯冠軍、5次金球獎等等。

雖然已經擁有輝煌嘅履歷，但係C朗仍然保持動力，其中創造紀錄就係佢堅持嘅原因之一。對於自己嘅成就，C朗就霸氣地表示：「有無邊位足球員嘅紀錄比我多？我唔認為有足球員比我擁有更多紀錄。」

確實C朗喺足球界擁有極多紀錄，其中好似5奪金球獎、12次入選世界最佳陣容、世冠盃最多入球、歐聯最多入球、最多入選歐聯最佳陣容、歐聯最多帽子戲法、西甲最快攻入300球、150球及100球紀錄、皇馬史上入球最多等等。

未來有無人可以超越C朗嘅紀錄暫時無人知，但係現役保持最多紀錄嘅相信真係只有C朗啦！