- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| 香港game迷絕唔似得外國嗰班咁長情，一隻game可以玩幾年，就算係幾咁die hard嘅《Halo》系列fans，都應該冇再掂《Halo 4》9世了。所以當佢哋聽到《Halo 5: Guardians》好大機會要到2016年尾先至出正式版，由上年12月尾開始有得憑住回顧作《Halo: The Master Chief Collection》，免費試玩新一集Multiplayer模式嘅Beta測試版，死人都會「袋住先」！ 不過去到1月18日，測試期就會屈滿，之前仲未得閒玩嘅師兄，好心老虎蟹都開嚟玩吓先啦！至於已經玩過嘅人，又覺得high唔high呢？呢方面冇理由少咗《Halo》擁躉、game界人稱「一姐」同「爆頭女王」嘅Kali講吓感受，大家不妨聽聽佢嘅意見，睇吓呢隻game仲值唔值等多接近兩年？ | |
| |
| 接近Bungie《Halo 3》水準 問親Kali對《Halo 5》有咩評語，佢總係唔會直接答我，而係用遊戲歷史答我，不過又真係要咁先顯示到佢對《Halo》系列嘅熟悉同喜愛程度。由一開波測試嗰日，佢已經仆到去玩。佢讚今集畀番《Halo 3》嘅感覺佢，點解係第3集，而唔係第4集？講故時間開始。 原來喺2010年，由零開始創造《Halo》系列嘅Bungie團隊脫離咗Microsoft，另尋發展，Microsoft就搵而家呢個343 Industries團隊接手延續呢個系列，第一隻獨立作就係《Halo 4》。 連Kali都承認《Halo 4》有跌watt，主要係343 Industries冇Bungie咁講究遊戲嘅平衡度，例如武器同地圖都會做成屈機嘅情況，競技嘅公平性低咗。但係今次《Halo 5》喺呢方面就有改進，水準接近番《Halo 3》，起碼唔會執到支勁槍就贏硬；同埋又繼承到《Halo》系列節奏快嘅優點，好有打速度、打反應嘅味道，所以繼續好啱佢口味，值得等正式版！ | |
| |
| 玩齊技能有利有弊 但係就連Kali都覺得今集其實係難玩咗，因為好講求multitask！之前嘅集數，除咗跳呢個最基本嘅技能之外，跑、飛、用盾、隱形等技能，只能夠揀一種嚟用，但係今集就一次過畀晒大家用（除咗取消咗隱形），即係你同時間可以做多好多嘢。 Kali話玩得熟嘅話，可以憑住呢啲技能更易殺敵，例如攀爬去高位置或定喺空中射人，甚至被偷襲時能夠扭轉形勢，好似敵人喺你背後嘅話，你可以用新式嘅「跣」法跣去佢後面再反擊。但其實呢啲係兩面刀，若然你玩得唔夠熟，同時顧咁多招，反而會令你剌手唔成勢，或者畀玩得熟嘅人輕鬆KO。所以，Kali認為呢隻係門檻幾高FPS game，玩得掂呢隻，玩其他FPS應該冇問題（編按：佢曲線讚緊自己），新手要有心理準備。 | |
| |
| 槍械特性更明確 另外，Kali又讚《Halo 5》槍械設定有進步，好似Battle Rifle同DMR兩支歷代都有嘅槍，今集將佢哋嘅特性做得更明顯。Battle Rifle嘅射速比較快，射程只算係中距離；而DMR嘅射速比較慢，但射程就遠啲，同埋個準星細啲，可以瞄得更加準。Kali話當大家了解到啲槍嘅特性之後，就能夠更易掌握開槍嘅timing，爆到更多頭，尤其喺跳起喺半空開槍嗰陣。 | |
| |
| 3種4對4打法 講番呢一集嘅Multiplayer玩法，測試版只能夠4對4，但有3種模式玩。第一個係「要塞」模式，即係兩隊人要鬥快搶點，走埋去要塞企夠時間，嗰一點就屬於你嗰方，搶夠3個點就贏，唔使掛住殺人。第二個係「殺戮之王」，鬥殺得多人嚟計分，殺夠50個就贏一局。第三個係「突破重圍」，兩隊人只各有一條命，隊員死晒嗰方就算輸。最鍾意爆頭嘅Kali，當然係比較鍾意玩第二、三個模式。 | |
| |
| 出世重生點要改善 不過，Kali都唔會盲目到覺得《Halo 5》係冇嘢要彈嘅。撇除畫面只有720p、格數又似乎唔足60fps等應該只礙於測試版先會出現嘅問題外，Kali覺得最大缺點係好多出世點同重生點都設定得唔好，有時自己一入地圖就喺敵人前面背住佢，一出世就即刻俾人射死，佛都有火啦，何況係爆頭女王！另外，Kali話好鍾意《Halo 3》嗰首theme song，今集嘅配樂唔係嗰種感覺，佢都認為要改喎。 仲有就係當搵唔到人對戰嗰陣，測試版冇得畀人㩒B掣quit，一定要等到電腦話搵唔到先畀走，呢點都係Kali唔滿意嘅地方，話如果正式版個server都係咁就唔可以接受喎。梗係啦！點可以要一姐等㗎！ | |
| |