Sony向來都係日系影音科技帶領者，今年德國 IFA 2019 展覽推出左多項新野，最印象深刻應數到其型仔懷舊新式高階 DAP，不過印象深仲有另一個全新喇叭產品，Sony居然推出旗艦級數碼有源喇叭，賣價6萬幾港幣，外型極之怪誕工業風，像極一對大耳機對住你，專門為短距離近場聆聽而設計，完全就係將耳機設計放大來做，不過有理由相信Sony一係唔做，一做就係最好，市場上真係無咩同類價格又同樣相貌仲要專攻近距離的有源喇叭。

 一睇Sony就諗起其標志性Hi-Res貼，加上佢強大的播放器DAP，只要買部強大Signature DMP-Z1數碼播放器，直接連接落去全新旗艦喇叭SA-Z1，就係一套簡單的Sony旗艦級音響組合，佢作為超特大耳機，可以彌補耳機無法呈現的音場及舞台感，廠方話適合作近距離聆聽，即係就咁放上書檯座係前面就可以，對香港同日本小型家居來講至為合適。呢對喇叭可以在短距離聆聽達到 100kHz 的全頻表現。

除左外表一眼睇到咁獨特，SA-Z1使用DAHybrid AMP 的數位與模擬混合放大系統，技術源自同廠的耳機擴音機TA-ZH1ES再加以改良，主動式的放大擴音輸出功率達 106W x 2ch聲道。

喇叭單元每聲道由兩個低頻單元構成名為「Tsuzumi」的對稱式反向配置，前面貼住有三個高音單元構成單聲道的「I-ARRAY」系統。Tsuzumi （手鼓）係日本傳統樂器也是SA-Z1聲學設計藍本，讓喇叭前後皆可以發聲，能夠產生更理想的音場效果。前面的「I-ARRAY」採用了一個名為單點音源 Coaxial Drive Layout 同軸驅動的設計。將高音和低音單元放在同一個圓心點上。原理就像同軸喇叭帶來相位一致性。而 Sony 更特別將高音及低音單元前後放置，巧妙透過高低聲頻率傳遞的時間差去營造更理想的立體效果。除了獨特的聲樂設計，SA-Z1 更強調簡單易用，只要用一條音源線去接駁電腦、 Walkman 、手機或其他影音產品，就可以如廠方聲稱享受到最極致入魂的音樂體驗。

音箱外殼則採用鋁合金，大幅排除多餘的震動，輸入方面提供 USB-B、專為 Walkman 輸入的 USB-A、光纖等三種數碼輸入介面。模擬輸入則提供 XLR 、 RCA 與 3.5mm 立體聲，用戶可透過切換，改變每個喇叭所負責的聲道，而喇叭之間只需要單邊端子進行輸入，兩邊並會透過 Sony 特製的零延遲線纜連接。

呢個喇叭預計要到 2020 年 4 月才會在歐洲上市，價格暫定一對為 7,000 歐元左右。造型咁特別，質素咁高，必定係各位Sony死忠的必買之選啦！