一年一度嘅世界足球先生頒獎禮尋晚正式舉行，而最受關注嘅獎項必然係最佳男子足球員身上，而今年嘅最後三強分別係雲迪克、美斯及C朗拿度，當中猶以帶領利物浦勇奪歐聯冠軍嘅雲迪克呼聲最大。不過，最終獲得殊榮嘅卻再一次係美斯。

世足先生嘅得獎者，係由各國嘅國家隊隊長、各國國家隊教練、媒體代表及全世界球迷一同投票選出的，而以上四個群體嘅投票比重都係一樣，就係25％。而每人投票可選出前三人選，其中第一名選票計5分，第二名選票計3分，第三名選票計1分，累計最高分嘅球員就係得獎者。

Leo Messi is the first player to win six FIFA men’s world player of the year awards  congratulations Leo #Messi10
The best player won the best player
awardpic.twitter.com/eWPBqAHjYR

— सबिन (@saabin15) September 24, 2019

而經過點算後，最終排名第一嘅係美斯，獲得46分；排名第二嘅係雲迪克，獲得38分；排名第三嘅則係C朗拿度，獲得36分。因此，美斯成功力壓大熱雲迪克及C朗，生涯第六次登上世界足球先生寶座。

不過睇番投票選項，作為荷蘭隊隊長嘅雲迪克，竟然將第一名選票投比主要競爭對手美斯。相反，作為阿根廷及葡萄牙隊長嘅美斯及C朗前三選項都無投給雲迪克，因此可以睇得出三人喺投票選擇上嘅分別。

雖然喺公佈結果前，唔少人都覺得美斯應該無緣今次獎項，因為上季巴塞及阿根廷嘅成績始終唔算太理想，但以個人數據黎睇，美斯嘅表現仍然係非常出色的。喺2018-19球季入面，美斯於各項賽事一共出場50場，攻入51球及交出22次助攻，其中喺歐聯攻入12球，成為歐聯金靴得主；西甲則攻入36球，成為歐洲金靴得主；西甲交出13次助攻，成為西甲助攻王。