來自Ball家族之一嘅「球弟」LaMelo Ball，今季並沒有加入NCAA，反而被其「大咀」父親LaVar Ball送到澳洲職業聯賽鍛鍊。不過唔好睇「球弟」好似無乜料到咁，相反佢嘅天賦已經被留意得到，甚至有機會喺明年成為NBA嘅選秀狀元添！

作為大哥，Lonzo Ball喺2017年以榜眼身份加入NBA，雖然今季被湖人交易至鵜鶘，但其個人實力亦得到外界不少讚賞，甚至對佢有好高期望。而二哥LiAngelo Ball與Lonzo嘅差距則有點大，唔單止無能力加入NBA，如今都未有簽約任何球隊。

正當你唔夠留意以為三弟可能都會步二哥後塵之際，原來三弟已經成為一眾球探嘅焦點，甚至係明年NBA嘅選秀狀元大熱！但其實呢一切原來都有跡可尋，其中作為大哥嘅Lonzo就曾經表示，三弟LaMelo嘅天賦係佢地三兄弟當中最高的，睇黎並唔係吹水。

對於LaMelo，有球探就表示佢嘅打法與獨行俠球星Luka Doncic有點相似，特別係腳步、創造力及視野，另外其投射能力亦都不錯，三分球嘅出手亦都相當迅速。其中喺澳洲聯賽中，佢就曾經喺面對聯賽嘅最佳防守球員防守下，個人獨取19分13籃板7助攻，表現非常亮眼。

如果最終「球弟」真係以狀元身份加入NBA，再加上榜眼Lonzo，「球爹」嘅大咀模式相信就要開啟了！

另外，原來LaMelo曾經與今屆NBA選秀狀元Zion Williamson進行過一次對決，大家可以重溫可呢場比賽，咁你就會對「球弟」嘅水平有更深入嘅認識。