魔盜王系列係迪士尼最賺錢最紅的其中一個奇幻歷險電影系列，由2003年的《魔盜王決戰鬼盜船》一路拍到2017年的《加勒比海盜：惡靈啟航》，Johnny Depp成為呢個系列的標記，加勒比海盜系列已經玩「完」，隨之而來係用同一種方式同樣的玩法搞個全新的系列，亞馬遜叢林加上「森林河流之旅」，配合「The Rock」狄維莊遜（Dwayne Johnson）同「Mary Poppins」艾美莉賓特（Emily Blunt），又想建立一個全新的《幻險森林奇航》（Jungle Cruise）系列電影，反正就係加勒比海盜的森林版，迪士尼係咪充滿創意呢？堅的，可以反轉由迪士尼樂園遊樂設施「森林河流之旅」拍返套戲出來，都係全新創意之舉。

呢套由迪士尼樂園遊樂設施「森林河流之旅」改編而成的全新電影《幻險森林奇航》（Jungle Cruise）。將會排係明年暑假黃金檔期上映。玩法同方式大家都應該好熟悉，由Johnny Depp轉做Dwayne Johnson，可唔可能又一次大熱接棒《魔盜王》（Pirates of the Caribbean）電影呢？大家睇睇條預告片睇下你覺得同《魔盜王》系列有無得比較！

為左接力《魔盜王》，迪士尼為《幻險森林奇航》足足花左三年的時間去寫作一個合適的劇本，創作一個全新系列的熱帶森林大冒險故事。電影講述飾演科學家Lily Houghton的艾美莉賓特發現左係亞馬遜熱帶森林當中有一棵樹，而呢棵樹擁有獨一無二的治癒能力，於是便展開這次尋樹旅程。當時她找來飾演船長Frank的狄維莊遜協助，聯同她的弟弟McGregor Houghton前往叢林，解開呢個神秘的傳說。

《魔盜王》最重要的係咩野？劇本？特技？都唔係呀，係Johnny Depp呀，強石Johnson夠唔夠料開拓一個電影宇宙先？？