《男兒當入樽》作為運動漫畫嘅神級作品，其周邊產品可以話多不勝數，而電子遊戲就係其中之一。據最新消息指，一隻由東映動畫授權嘅《入樽》手機遊戲近日正式登場，當中包括iOS及Android平台亦都可以搵到。不過較為可惜嘅係，呢隻Game由上海蛙撲公司發行，亦即係話只限中國內地...

雖然作為香港人未必想玩呢隻於大陸發行嘅Game，但睇番遊戲設計係以即時籃球比賽模式進行，玩家將可以操控一眾《入樽》角色，好似櫻木、三井、流川等，並不斷提升其技能等級，從而挑戰不同而又強大嘅隊伍。另外，好似櫻木軍團、流川楓啦啦隊亦都會於比賽中出現，為玩家打打氣。

而比賽期間，一眾角色會有自己獨有嘅絕招，好似主角櫻木嘅「人牆防守」，赤木嘅「大猩猩入樽」等，相信玩家將可以更真實體驗漫畫當中嘅美妙時刻。

唔知呢隻《入樽》Game未來會唔會於香港發行，如果有機會都真係希望一試，相信一眾Fans應該都係咁諗。