作為YouTube世界第二多訂閱人數、個人頻道第一多訂閱人數嘅YouTuber，網名PewDiePie嘅瑞典YouTuber今日突然宣佈將於2020年初暫時離開YouTube，原因係佢想比自己可以休息一下。

現時世界YouTuber人數眾多，並且有唔少人都想成為YouTuber，但其實YouTuber背後嘅辛酸又有幾多人知呢？如果係以個人作為單位嘅YouTuber，拍片、剪片、度橋、錄音、上字幕等全部一腳踢，所花嘅時間絕對唔比打工仔少。

而作為業界龍頭擁有1.02億訂閱人數嘅PewDiePie，相信就需要花更多嘅心力去維持自己嘅競爭力及每條片嘅質素，所以由2010年4月開始建立起自己YouTube頻道嘅PewDiePie，黎到2019年年尾已經接近做左10年。因此，PewDiePie決定比自己放下假，於2020年初將會離開暫時YouTube。

PewDiePie表示:「我認為而家係我講呢個消息嘅好時機：我將暫離YouTube界。我已經下定決心，因為我好攰，我覺得非常攰，我唔知道你地睇唔睇得出。我只希望你們可以知道，明年初我將會消失一段時間，之後我會有更詳細說明，但我而家係想先比一啲心理準備你地。」

現年30歲嘅PewDiePie，曾長時間佔據YouTube最多訂閱人數嘅寶座，但直到印度音樂頻道嘅興起，其龍頭位置旋即被搶走。不過，但以個人作為單位嘅話，PewDiePie仍然係世界最多訂閱人數嘅帳戶。