「反手聖光劍」呢個Term絕對係當年唔少小朋友必定會知嘅絕招之一，但黎到今日你可能已經唔記得呢一招係黎自邊度，而答案就係《達爾大冒險》。

《達爾大冒險》又稱《神龍之謎》，唔少朋友可能都對呢套漫畫有啲印象，而如果記得嘅你應該都有感呢套曾經喺《週刊少年 Jump》上連載嘅漫畫絕對算得上係神作之一，而按「Jump Festa 2020」宣佈呢套神作將於2020年秋季推出完全新作動畫！

由1989年開始連載，並於1996年完結嘅《達爾大冒險》，唔經唔覺黎到今日已經30年，呢套漫畫於1992年9月動畫化，估唔到相隔約28年後竟然可以再度動畫化，並會混合CG及動畫作畫黎表現，由東映動畫製作。

《達爾大冒險》故事講述一名住在島上不會魔法嘅少年達爾，有一天遇上登島嘅勇者艾班(阿邦)，其後與另一位本來搞笑，但後來成為真男人嘅阿布一齊學習魔法，並成為勇者，去挑戰大魔王及其多不勝數嘅手下，最終拯救人類，劇情可以話相當熱血。

而《達爾大冒險》嘅故事慨念其實係黎自知名RPG遊戲《勇者鬥惡龍》，前者唔少怪物都可以喺《勇者鬥惡龍》中見到，好似史萊姆等等，不過設定上又唔完全一樣，特別係主角達爾係擁有龍紋嘅龍騎士勇者，所以擁有主角光環及壓倒性嘅力量。