如果你係一個《哈利波特》迷，世上有幾個地方係一定要去，例如環球影城入面嘅專區，或者倫敦嘅哈利波特片場，未來大家又可能多一個地方要去，就係東京市內嘅哈利波特主題遊樂園！

成件事係咁嘅，東京附近除咗迪士尼樂園，以及以Sanrio人物(如Hello Kitty)為主題的「Puroland」之外，其實仲有個開咗近百年(1926年開業)、由西武集團營運、位於練馬區嘅「豐島園」。但基於大家去過東京幾次都未必聽過呢個主題樂園嘅名，就知道佢近年經營得唔太成功，入場人數亦由90年代嘅每年400萬跌至2018年嘅100萬多啲，於是西武集圍就計劃結束營業，並出售整個園區。而據NHK報導，華納正與西武接觸，希望接下園區，並將其改建成哈利波特主題樂園。

豐島園

據報目前雙方只係初步接觸，一切都未有定案。而東京都政府亦有意收購目前園區部份土地，作避難公園之用。換言之即使華納最終真係接手，能使用嘅土地亦會比目前「豐島園」佔地22公頃更少。作為參考，擁有哈利沒特園區的日本環球影城，總佔地為54公頃。