專門設計生產古怪玩意的日本公司Ecord Works又有新創作，今次出品CLOCK WATCH，將時鐘帶上身做手錶，意念簡單有趣，通過放大縮小唔同的物體產生奇異對比，犧牲少少便攜性，就可觸發巨大注目度，先生而家幾多點？路人皆見自己睇，實在為世界帶來共享貢獻。係緊急的情況下，仲可以用作簡單防護，可以擋得兩野！你未見過人帶住咁大塊野係手行？點會？我由細到大見「紫龍」同「冰河」都係咁帶住週圍跑！

CLOCK WATCH時鐘鐘錶係一個掛牆鐘大小的手錶，可以隨手攜帶。帶住佢除左自己睇時間可以仲比周圍的人共享，符合新世代共享原則，產品暫時只有概念性，但好快就會係網上公開發售。帶住佢好快就可以成為世人焦點，報時的精英。

據Ecord Works網頁資料，暫時未能量產，只會發售限量的概念手工製品，眼見就有兩種大細。全人手製作，使用輕質的樹脂掛鐘作為基礎材料，肯定是全新的手錶體驗，特別想高調浮誇的朋友，送一個比佢，呢個係錶唔算送鐘。

ekodworkstore