如果你問我三月最期待的劇集，一定係最超現實讓人膽戰心驚的韓國抗疫喪屍劇《李屍朝鮮》第二季，劇情如同現實，世界都受到疫症打擊，人命生死存亡，但上流高官帝皇之將仲係玩緊政治同權力的鬥爭，睇返第一季其實就好像睇緊現實歷史咁樣，上面瞞得就瞞連皇帝駕崩都絕對唔可以走漏風聲，如果比政敵知道絕對比喪屍恐怖，至於喪屍疫情起源之迷團，背後是否有人為製造，邊個係疫症罪該萬死嘅罪人等，加上病毒異變今季絕對開始入肉。我話你知第一季的《李屍朝鮮》最大的缺點是得六集太少，唔夠喉，所以3月13日上第二季，肯定是疫情下必睇之作，有人屈王世子係疫症源頭，如果查到邊個係疫情源頭揭露內裡陰謀就更好睇，我講緊喪屍疫情！

其實喪屍電影同劇集何奇咁多，點解《李屍朝鮮》特別出色呢？可能因為本來宮廷鬥爭就係亞洲人的強項，外國鬼佬無論點基智都唔及亞洲人，老老實實《李屍朝鮮》個編劇金銀姬真係堅到無倫，故事非常多伏線，喪屍又快又多仲識異變，災難中見人禍，人禍中大玩權鬥，回憶一下首季絕對係現實瘟疫中的寫照，由上到下好多情節同恐慌都似曾相識 。呢套劇的編排係世界級，導演的功力也好深厚，讓作品有深度同時又完全滿足睇慣宮廷劇的香港影迷。而且唔單止緊湊的劇情，拍出來的特效都好有質感，每一集都有著電影般的感覺，如果家中有4K大電視甚至投影機，個種大量喪屍高速追擊的壓迫感同刺激度，唔講得笑咁正。

如果你未睇第一季，我覺得都係一種福氣，因為你大可以一次過睇哂2季，比起睇完第一季六集等到而家的人，你是賺左！所以未睇的朋友你有福啦，非常值得入手觀看。

簡單講下《李屍朝鮮》故事描述一個古代的朝鮮王國，因貪腐和飢荒而衰落,同時國王逝世的傳聞和奇怪的瘟疫開始流傳,染上瘟疫的人不會死去,卻依賴吃人肉維持生命。陰謀論者指責王世子是始作俑者,王世子於是展開調查,查明真相,以拯救國民。

在第一季完結篇的最後5分鐘，朱智勛飾演的「李蒼皇太子」、與裴斗娜飾演的醫女「徐菲」先發現，原來喪屍群出沒的原因並非晝夜而是「溫度」，冬天來臨第二季日光日白都有喪屍呀！你記得嗎？呢個正正是劇情進入最高潮時第一季就完左啦！。而柳承龍之前接受韓國媒體專訪時曾經透露，第3季先係真正最精彩的高潮！即係話《李屍朝鮮》至少會有三季，係咪好想睇呢？夠忍得不如忍到第三季先開始睇啦！3月13號Netflix上架你可以繼續忍住