丹麥神級家居影音品牌Bang & Olufsen又一次展現其設計的能力，全新推出一個好有品味的新型智能喇叭 Beosound Balance，由倫敦設計公司Layer合作，外型分兩個部份下方係圓柱型木底座上面放住一個水桶式主體，一浸強大藝術品氣息，唔開聲都已經搶眼照人，而同時具有高度聲學設計同高科技數碼處理聲學應用能力，真正聲色俱備，你有咁上下的家居或辦公室優雅環境，買一舊Beosound Balance係畫龍點睛智能發聲。

設計同品味從來都係Bang & Olufsen先聲奪人的地方，不過其實佢係一間音響公司，聲音從來都唔會失禮，今次呢個新 Beosound Balance用左好多科技去協助聲學處理，喇叭原來唔一定方方正正立方體，圓形係B&O的強項，你睇佢大型喇叭Beoplay A9都係一個大圓形，今次就係一個圓柱體，下面的木唔講得笑係高級木材裡面係向上擺放的低音大單元，上半部份係高級織物廠 Kvadrat 織物包覆的喇叭單元，入面有哂由上至下兩組高音單元、三組中頻單元同另一個向下擺的低音單元，同下部木體結構相對應。

所有操控係最上方觸控面板，形成一個「美」學的結構，不過其實我較欣賞佢內裡的聲學同科技應用，科技當然唔係有Led燈著起燈光閃閃個種，LED佢地有但真正強大係其智能，佢內裡有個收音咪高峰時刻AI收集喇叭發出的回音，可以智能化根據實際擺設位置調整音效，例如後牆距離同反射聲作房間補償。測量低頻量，及房間中的聲音反射，然後創建數碼濾波進行補償。當然個咪高峰仲可以收音幫你完成一般其他公司都有的基本智能應用，例如Google Assistant和Amazon Alexa（要遲下更新支援）提供Balance內置語音控制支援。用家可以借助Google Chromecast，Apple Airplay2和Spotify Connect（呢個要年中先支援），用戶可以輕鬆直接通過智能手機串流傳輸作不同應用同串流播放。最後佢當然是支援是新藍芽的無線連接以及多個B&O喇叭串連應用。

至於聽歌來講，最大的聲學功能係佢有兩種智能聲學模式選擇，通過數碼的AI設置調節聲音。第一種模式是全方位模式即360度發聲，可以讓喇叭週圍周圍產生均勻的聲音，而第二種則產生更加集中的定向演示，讓你座式企定定係前面聽歌。

Beosound Balance 同佢地其他產品一樣，就係即時發佈，如今已經正式上市，有自然橡木和黑橡木色兩種顏色，定價 2,250 美元，平定貴就因人而異，個人就覺得相比起買個所謂「藝術品」擺設，Bang & Olufsen又好聲又實用，其實非常有競爭力。