音響其實就是電器，玩音響就係玩「電」，電的源頭如果「靚」聲音出來就會有完全唔同的聽感，這是玩音響的發燒友一直堅信的理念之一。一般影音電器跟機用外接開關電子火牛被認為是衰聲之源，英國iFi Audio係2015年就推出一種名iPower電源供應器，標榜超低底噪並搭載軍用等級的ANC主動抗噪電路，據說一直係平價電源牛市場的皇牌商品，近期iFi又再改潮換代推出神級全新iPower X電源牛，外觀更霸氣、軍用ANC主動抗噪電路升級第2代，輸入電容大一半達到47uf，而輸出電容大150％，數字上超低噪聲只有1uV噪比原本更好20倍，以數字論極級驚人，可說是「神」級的電源產品，如果你有器材用緊5V、9V、12V、15V的電子牛你會唔會想轉左佢做ipowerX試下有幾神奇？

如果你信服同跟iFi Audio廠的論述，呢隻ipowerX將會帶比你超級寧靜好聲的安定感。讓耹聽背景變得更「黑」更「靜」從而加強聲音細節，而iFi power只係幾舊水的價錢，相比起其他選項包括購買LPS電源牛甚至購買大型電源隔離牛式電源處理器，開支屬「蚊」比同「牛」比，當然新款ipowerX同舊款的理念同運作一致，只是用料更好，供電能力更強A數更高，數據上更靚。 

音響有趣的地方是眾說紛紜，iFi Ipower為例多年都係備受爭議的產品，iFi強調經過實際量測iPowerX電源供應器的底噪於1uV，甚至比自家另一款電源供應器仲更加安靜，也比線性電源LPS安靜。不過好多發燒友對其科學式數據表達不相信，覺得只是取巧玩數字，而實際聲音表現評價也分兩派，一派認為用後完全唔掂，另一班人則評價為非常抵用，改變明顯，刀仔鋸大樹，今次新升級版本相信又會引起發燒友新一輪爭議，反正舊版港幣$400都唔駛，係下下萬萬聲的音響世界，實在是窮人恩物，新版ipowerX價格都可望一千樓下，買來試試「黑科技」都係一大玩樂點，音響嘛耳聽為實。

記住一樣野，iPowerX依據輸出電壓/電流不同，一共有5V / 3.0A，9V / 2.5A，12V / 2.0A，15V / 1.5A四種版本，購買用家一定要確認自己的需要！除左V數外，大家仲要睇埋A數，例如家中有些大型影音用無線路由器可能用到12V/4A以上的電源配置，咁ipowerX只能提供2A輸出就屬於唔適用，如果你一定要改善電源建議你另造線性電源LPS。新版ipowerX來講以5V版本為例已調高到3A的輸出，好多音響用的小型器材同裝置都已經好夠用，例如Raspberry Pi或其他相似的微型電腦等等。

iFi Audio的音響配件產品又平又多花款，喜歡在低價位求改變的用家最適合，剩係玩佢ipower電源牛變聲都有排你試，我聽過有發燒友家中一用就10個ipower牛，全屋所有用SMPS電子牛小型電器全部用哂，聲音係咪真係好出色？佢話係咪係囉反正幾百元一個仲「平」過林鄭捐比乞兒！