天才的香港政府禁止有酒牌的賣酒，目的係防止酒後亂性加強接觸傳播肺炎，無咁醒的歐美地區就全面宣佈禁令，正式關閉人群有機會聚集營商場所，美國部份重災區省份只允許必要零售商店（essential retail）繼續營業，其他商業店鋪全部關閉抗疫。但就產生一個有趣的個案，早前美國遊戲出售商GameStop死都唔肯關門仲司法覆核自稱其針對遊戲使用的周邊產品同遊戲係幫助居民留家的生活必需品，所以佢地自定位為「必要商店」（essential retail）可以繼續營業，呢樣野帶來無限辯論空間，不過剛最新消息，GameStop最終雖然贏左辯論但為左頭「家」都係全線關門暫停，只保留網上銷售同送貨。其實留在家網上購物咪幾好，香港要出手就應全面禁所有商鋪營業才是正路。

係美國多個重點抗疫州份都發佈禁令，關閉人流聚集的商業場所，只允超市等必要零售商店（essential retail）繼續營業。但賣遊戲同電腦週邊的GameStop上星期就死都唔肯關門，仲自稱旗下商品係為左消費者留在家對外網絡聯系的基本所需物品，是為「必要商店」（essential retail），所以佢地應該毋需關鋪不受限制咁話。一般理解「必要商店」指除左政府單位、警察局、消防局、醫院、藥局、銀行之外，超市、雜貨店、外賣餐廳等「維持生活所需」的商店都會維持開放。至於遊戲店則唔太算「必要商店」（essential retail）。

呢場辯論就比較有趣，聽落好像有道理，買MOUSE買遊戲買網絡CAM都係為左留在家長期作戰，點都係保持社交距離降低病毒疫情蔓延的良好方法。因此GameStop自我定位為「必要商店」好像合情合理。GameStop仲提出抗疫期措施：「所有店內將實行社交距離，包括只容許同時10個人進入商店、減少營業時間、暫停遊戲舊換新服務、並推出DOOR TO DOOR交貨政策。同時也暫停所有店面促銷活動，避免人群聚集。」

不過最終雖然GameStop贏得大多數人的「必要商店」認可，卻因外部壓力同員工壓力GameStop終於3月22日就開始關閉所有店面，乖乖面對現實，公司改以數碼網上處理訂單，証明一樣野，係嚴峻疫情下最「偷雞」的商店都識得投降關門自我隔離，香港政府同各非「必要商店」（essential retail）都請學習一下，可唔可以真真正正暫停實體經營一星期幫下手抗疫，由上年到而家，叫大家罷下工休息下原來真係咁難！