位於高田馬場附近嘅「ミカド」喺日本機迷心中有著特別地位，除咗因為佢唔係Sega或Taigo等大集團營運，而係由池田稔獨立經營，更因為「ミカド」內有大量傳統機台，亦會舉行格鬥Game比賽，連街霸之神「梅原大吾」都曾經係常客，造就機鋪在當地機迷心中嘅地位。

問題係，日本機鋪生意亦唔見得有幾好，而近來武漢肺炎亦進一步打擊生意，「ミカド」生意額亦跌咗5到7成，更唔好彩嘅係社長池田稔早前先諗住發大黎搞，所以接手咗高田馬場區內另一間機鋪作分店。社長指如果情況持續，不出數月「ミカド」就會執笠，逼於無奈之下發起網上眾籌，希望籌到2000萬Yen，捱過呢次寒冬。

結果日本機迷相當出力，自上星期六發起眾籌到今日，已經有超過2000人參與眾籌，籌得超過2700萬Yen。雖然話「ミカド」亦會提供感謝卡、打機優惠之類嘅回報，但相信大家都只係想盡力保護呢個集體回憶。

香港早年亦有唔少機鋪因為各種原因而結業，剩返落黎嘅機鋪亦變哂做電子賭場，街機界頓成一潭死水。你話如果當年有機鋪提出眾籌救亡，大家又落力支持，今時今日香港嘅街機生態又會唔會截然不同呢？