英國音響巨匠KEF近期推出左一款全新數碼音響系統KEF EGG Duo ，設計源自KEF屢獲殊榮的LSX無線喇叭，採用Uni-Q同軸共點單元技術，簡化成障板設計加上五種鮮豔顏色選擇，音色及設計兼備，一對玩盡音樂、電影、電玩發燒，而且價錢非常貼地，相信係近期最易觸動人心的新型喇叭系統，如果你未有喇叭，無論你想要電腦喇叭定soundbar還是劍指音響聽歌，KEF呢個技術同單元可以話無得輸。

KEF近年推出的產品顏色配搭相當出色，五種顏色悅目耀眼，有啞黑(Black)、紅 (Red)、寶石紅 (Ruby)、 青藍 (Teal)及綠(Green)，聽講設計師用色背後有意念，又幾有趣。

話說Green 綠色代表熱愛想像與創作的夢想家。Red 紅色就代表喜歡跳舞、經常以個人 Spotify 播放清單在家舉行派對的派對常客。青藍色代表沉迷於 Netflix 追劇黨。

Ruby 寶石紅色則屬於社交能手，擅長於在家中製作 YouTube 直播。Black 啞黑色代表係電玩世界永不言敗反叛玩家。唔知你覺得呢D色彩係咪應咁樣劃分，反正如果畀我選擇，我建議KEF出香蕉黃色代表我沉浸於黃色網絡世界當中。

老老實實，我唔知KEF EGG Duo有幾多成KEF LSX無線喇叭的水準，但我可以大膽講一句，KEF的LSX真心好聲，可以話係無線喇叭當中最出色的設計同創造之一。如果以同一單元的設計，推出KEF EGG Duo有其7成功力，以HK$ 2,980的定價，當佢電腦或電視喇叭都超值抵玩，更枉論其神奇超卓音響性能同聲音表現。有興趣可以直接上香港中環 KEF Music Gallery試聽。

我從來唔睇新聞稿，不過有一句十分認同KEF 將近六十年聲學、物料應用及創新單元技術專業知識，傾注在 EGG Duo 內。的確佢濃縮左KEF LSX的精髓，KEF由LS50書架喇叭大獲好評，發展到LS50無線喇叭，進而推出更細小但科技至強大的KEF LSX，到今日更貼地更細小但依然保留精華的 EGG Duo，一路走來，真心傾注。疫情底下係多咗人在家玩音響， 入門唔一定下下過萬，三千銀玩一對KEF EGG Duo，看來呢間英國老牌音響廠係看準時機。