模型來講，識玩一定玩呢個香港本地出品網絡爆紅物「黑人抬棺」 1/64 模型，無論紅事白事定白事變紅事，你屋企都可以重現「黑人抬棺」經典非洲棺材舞，7個抬住行又得，5人跪住爬都得，款式隨意最緊要好玩，仲順便支持香港出品。唔好話我知你無睇過熱爆「黑人抬棺」舞蹈

無錯，香港人流行觸角強大，新產品貼地快速，2020年忽然今期流行流行黑人抬棺，當然如果我要話你知班黑人跳咩就要從文化習俗講起，話說係迦納即非洲容祖兒前車路士球員艾辛家鄉，抬棺材跳舞係習俗，目的為左讓喪禮唔好太悲傷，就會請人到場表演，搞下氣氛咁囉。好難理解，一岸之隔的台灣白事會請「辣妹跳舞」，文化的事我識條鐵咩。只知後來當地有間叫Benjamin Aidoo的公司將抬棺材跳舞服務再加上少少編舞、服裝等精緻做好佢，就引來BBC News的採訪，最後係網上爆紅，全球知名，成為網絡熱傳爆紅之物。

講返模型，呢個黑人抬棺材模型由香港的 JMG 1/64 Miniatures 模型工作室製作，比例1比64，唔知呢個比例會唔會犯禁，不過個模型又做得幾仔細。有兩個款式，一個係7人一組企住抬棺材，一個係5人一組跪住爬，就咁睇腦海中自然已經有配樂響起，400蚊港幣有找，買一set返去放係度都幾有趣，全球預訂有買就自己睇路。預售將於 4 月 24 日截止，即聽日玩完，暫定 5 月末出貨。有興趣的玩家可參考 JMG 1/64 Miniatures 官方網站。