疫情底下好多生意模式都有所改變，音響行業入門產品需求大增，想試新產品的用家比過去更多，除左上門市試聲外，租借喇叭回家試玩又有無得諗呢？日本就有一間細喇叭品牌Egretta旗下 全方位喇叭推出5日4夜的租借喇叭服務，提供兩種細小座枱式喇叭選擇，只需要 4,800日元，唔知香港又會否有商家一試推出租音響服務，Netflix形式會唔會係一條出路？

日本有間音響企業，推出租賃喇叭服務，價格仲好平，旗下品牌喇叭5日四夜只需4800日示不連稅，不過運費就要另行支付，呢個服務係5月7日先開始首次試行，可以話係當地第一家試推出租服務的商家。不過旗下品牌Egretta的360度全方位喇叭其實全部都好細隻，座枱式放置，而且輕巧易放，如果係傳統式大型音響喇叭，出租運來運去就唔係咁容易達成。

根據Egretta品牌可出租喇叭，共有4個型號選擇，不過實際上喇叭只分兩種，各分有源及無源兩種選擇，睇下想租賃的用家本身有無影音產品同擴音機，如果咩都無就可以選擇一體化連內置擴音放大的型號，就係咁簡單。

想租只需要上相關品牌網頁申請，出示身份證明，例如駕駛執照等，然後網上比錢就得，用家需要承擔運費，如果試玩完後直接購買仲可以退回租賃費用。唔知呢個模式有無得諗諗，香港有無機會有廠家敢試驗實行呢？不過日本人傳統上奉公守法， 愛護珍惜器材，又同華人地區的市場有唔一樣的地方。反正有人帶頭就有改革，期待下啦！