如果你係愛貓之人，又鍾意上網睇貓嘅話，你好大機會會聽過台灣嘅Youtube Channel 《黃阿瑪的後宮生活》。而近日佢哋就宣佈會與日本大熱扭蛋系列「Animal Life」嘅動物原型大師「朝隈俊男」合作，以「後宮」中7隻貓為藍本推出「Animal Life圓滾滾聯名系列」。

《黃阿瑪的後宮生活》在2009年創立，當時兩位「奴才」志銘和狸貓遇到一隻黃白色流浪貓，收養後取名黃阿瑪，並開始紀錄「阿瑪」嘅日常生活，到目前為止又陸續收養多7隻「主人」，頻道、專頁一直發展，亦有推出書籍及相關產品，成為亞洲一眾貓奴們熟悉嘅品牌。

今次與朝隈俊男合作推出嘅扭蛋包含「後宮」中其中7隻貓：阿瑪、招弟、三腳、Socles、嚕嚕、柚子、浣腸，每隻都有寫咗名嘅貓抓板地台，會由即日起到6月29日於台北三創生活園區1樓十二立方發售，2000台幣(約HK$520)一盒有齊7隻加隨機重複一隻。

係，我知依家去唔到台灣買唔到，但話唔定人家之後有得送黎香港呢？睇定先嘛！