大家或者仲記得日本解除緊急狀態後，東日本及西日本遊園地協會出過公告，例如叫大家玩遊樂設施時唔好叫，室內設施要開窗保持通風，樂園人員唔好同遊客接觸——簡單啲黎講，就即係趕絕咗鬼屋嘅存在。咁但係你又想玩鬼屋喎，咁點算好？得！你有冇車呀？

圖片：株式会社怖がらせ隊

日本「株式会社怖がらせ隊 (恐怖公司)」為咗令大家於疫情之下都可以玩鬼屋，今年夏天將會於日本赤羽橋站附近開設據稱係世界首個「Drive in」鬼屋，簡單啲講就係一個有「鬼」嘅車庫，你揸架車入去，主辦方透過車內收音機播放劇情，然後啲鬼喺車外面嚇你，玩完你再揸返出返黎。由於全程車外車內完全隔絕，咁你就可以享受被人嚇之餘，又避免感染風險啦！

圖片：株式会社怖がらせ隊

收費方面，首日(7月4日) 必須自備汽車，一部車唔理你幾多人定係8000Yen，次日 (7月5日) 可以多加1000Yen租車 (限四人)。另外兩日都可以加多1000Yen 買「血Option」，即係啲鬼會用幫你裝飾下架車 (唔包洗返)；加1500Yen有張紀念照。唔知大家覺得Work唔Work呢？