日本《少年Jump》上連載嘅漫畫，可以話係陪住所有亞洲男仔一齊長大，當中亦有數之不盡嘅經典角色，假如要問大家最鍾意邊個，相信就唔會有任何共識，但如果問你邊個最強，大家就應該會即刻諗到邊個排第一。日本網站「Voice Note」就做咗個票選，等日本網民投出「最強《少年Jump》主角」，同大家個心水有冇唔同？

頭三名：孫悟空 (349票)、拳四郎 (181票)、小雲 (97票)

圖片：網上圖片

講到「最強」，第一位係悟空真係一啲都唔出奇，畢竟能夠一嘢打爆一個星球嘅角色真係唔多，就算有咪又係出自《龍珠》，所以單以主角黎計，悟空一定係最強，領先第二名拳四郎接近一倍票數亦相當合理。反而同樣由鳥山明畫嘅《IQ博士》中嘅小雲能夠得到第三就頗令人意外，投票者指小雲隨隨便便就可以將人打飛到圍繞地球轉幾個圈嘅實力令人印象深刻喎。

其餘排名：

第四位 筋肉人 《筋肉人》

第五位 兩津勘吉 《烏龍派出所》

第六位 路飛 《One Piece》

第七位 哥布拉 《哥布拉》

第八位 绯村劍心 《浪客劍心》

第九位 行運超人 《行運超人》

第十位 齊木楠雄 《齊木楠雄的災難》、夜神月 《Death Note》

而其他以戰鬥出名嘅漫畫主角，例如《Naruto》嘅鳴人、《JoJoz》嘅空条承太郎、《鬼滅之刃》嘅灰治郎、《聖闘士星矢》嘅星矢、以及《幽遊白書》嘅蒲飯都排到10名開外，《Hunter X Hunter》嘅小岡同《BLEACH》嘅黒崎一護更加係廿名以外。睇黎日本網民眼中嘅最強並唔係單指戰鬥力呀下！