年初二 Boxing Day 用利是錢買TIE戰機

文：MenClub 魏文青　　圖：互聯網
POSTED ON 20 Feb 2015

咩話？年初二就拆利是？唔係要等到初七嘅咩？對唔住，文青由細到大都深明「現金流」嘅重要性，絕對唔會容許屬於我嘅錢比人砸住，所以以前我係等啲親戚擰轉面就開始拆，今年等到年初二已經算係好畀面添！咁有疊利是錢喺手就緊係要買玩具啦！以下呢隻來自《Star War》的LEGO TIE 戰機，睇黎就係一個唔錯嘅選擇！

LEGO的「Ultimate Collector's Series」一向都係針對成人LEGO粉絲－－再準確啲，係成人嘅《Star War》LEGO粉絲。因為成個系列由2000年至今出咗超過三十套LEGO，除咗兩架「蝙蝠車」再加《Avengers》入面S.H.I.E.L.D隻飛空艦，全部都係《Star War》嘅作品，而最新作品就係呢隻TIE戰機。完成品有18.5吋高、12.2吋闊，總共由接近1700塊LEGO組成。機身頂部的艙門可以打開，當然亦有附送機師公仔。最適合就係放假用黎消磨時間！

不過咁，仲有兩個問題係未解決。一，隻嘢要到今年五月先出，所以今個新年都係冇得砌。但係又唔緊要，因為第二，隻嘢要200美元(約1550港元)，而以本文青嘅利是收入，扣埋比返阿媽嘅「回佣」(「唔係我派利是你鬼有得逗！分返啲黎！」)，要逗埋下年份利是先會夠錢買。所以TIE FIGHTER，我哋猴年再見！