疫情造就特別嘅創意工業，日本人嘅創意又一次突破盲腸。日本創科新企Donut Robotics推出一款識放大用家聲音仲可以用即時翻譯八國語言嘅智能口罩，戴上「C-FACE 智能口罩」你講野撳一撳個掣就有喇叭放大聲音，溝通自然無懼口罩阻隔，見到外國人，仲可以上前使用翻譯功能：「Excuse me！ I am Chris Wong….」

而家戴口罩最大目的係抵禦病毒，而口罩其中一個最大障礙某程度上係溝通困難，因此 Donut Robotics 呢間公司就研究可以放大聲音等用家戴住口罩都可以大大聲講野溝通。得一想二嘅日本人仲將類似 Google 翻譯嘅即時翻譯功能加入口罩，配合手機使用仲可以即時翻譯8國語言包括日文、中文、韓文、越南文、印尼文、英文、西班牙文、法文等 。

不過附加嘅即時翻譯你要當係課金Bonus，因為佢並唔可以單獨使用，只能夠串連配合手機藍芽連接使用。不過Dunut Roborics 首席CEO話C-FACE 日文翻譯效果比 Google API 或其他主流技術仲要強大。C-FACE 透過藍芽連上手機，最長距離可達 10 公尺。而呢個C-FACE 智慧口罩有兩種定價，單口罩定價約200幾銀港幣，而App 翻譯功能係要另外收費。口罩係日本預計 12 月上市，海外出售就可能要等到2021年 4 月。

C-FACE肯肯定係疫情下先會出現嘅產品，如果過去無病無痛正正常常點會有人買個內置喇叭口罩，講野仲要撳掣出聲，但疫情正好改變世界造就特殊商機，我黑心期望個口罩無市場盡快收皮，因為只要疫情完結，大家毋懼肺炎 ，呢個產品就可以收檔！