近日香港傳有第五間航空公司大灣區航空申請牌照，逆市之下航空公司真係有得做？全球客運市場萎縮，今年至今全世界執笠左22間航空公司，唔講左右黃綠單睇生意，廉價航空前景真係咁好？當然大灣區航空有本事有膽識，但原來亞洲有一間航空公司業績爆出一地眼鏡碎，今年第二季竟然獲利創新高，成為暫時亞洲唯一賺錢航空公司，佢就係台灣中華航空！

全球航空運輸業因為疫情海嘯叫苦連天，多間航空公司倒閉，當中包括南非最大航空公司南非航空 （South African Airways），南美洲第二大航空公司哥倫比亞航空（Avianca）同澳洲虎航（Tigerair Australia）等等，業績難捱空姐都要送外賣的今日，台灣有間中華航空居然能夠報喜第二季獲利24.59億元台幣賺錢業績創新高？真係估佢唔到，台華航同台灣航空業呢幾年頻頻受到空中服務員工潮罷工影響 ，加上旅客減少疫情影響載客率實際今年跌到只剩4%，業績公佈前大家都預左同全球所有航空公司一樣蝕到喊，點知日前一公佈業績一地眼鏡碎，中華航空居然成為全球極少數不退步反而賺錢的公司。

當然，我無意吹捧華台航，只係見近日大灣區航空漏夜趕科場，同大家研究下華航憑咩野無客路下大賺。香港人心目中疫情下要賺錢一定係非本業操作，炒下地皮物業收租或者投資對沖！但台華航又唔係喎，佢真係靠本業航空發奮圖強賺錢。原來佢賺錢靠三個因素：第一無人流少載客就轉行玩貨運！第二人力資源慳省人工減少開支(呢點我就唔太支持！做法有效卻值得相確) 第三油價大減行大運。華航旗下有18架 747-400 全貨機，規模係全球第六大航空貨運公司，機隊優點係載貨量大，不過缺點係比較耗油，剛好近期國際油價下跌，燃油成本降低，因而受惠。加上疫情底下航空貨運成為奇兵一路。 而且專攻貨運更加可以減少空中機組人員， 減少空中服務員人力資金開支大減成為華航最有力嘅節流方式。三管齊下營造營運新高峰，奇蹟都係天時地利人和整合出現。

不過，一時賺錢又唔代表永恆，全球疫情持續肯定係對航空業界好大打擊，拖落去一定係攬炒。講返近近地如果香港第五間航空公司正式運作，而佢主打平價客運，又有無得做？我知，大家可能對於大灣新航空公司無咩興趣，畢竟如今所謂的香港的航空公司，開張同執笠我地都係比個花圈佢，一笑置之！搭飛機有新選擇大灣區航空公司，咁咪祝大展鴻圖囉！