情侶之間嘅偷食，係一件定義上必須有三個人參與、但只有其中兩個人知道自己參與緊嘅事。當中包含心計、欺騙、時間管理、刺激、高潮——聽落係咪好似一隻Game？冇錯，開發商「A Normal Monkey Studios」都係咁諗，於是佢哋就會推出一隻以偷食為主題嘅多P…呀係多人遊戲至啱！

睇遊戲預告，成隻遊戲總共有三個角色，包括「太太」，同太太偷情嘅「鄰居」，以及提早返屋企嘅「老公」，老公當然就係要搵到偷情證據以及奸夫，而太太就係收埋證據同掩護奸夫，而呀奸夫除咗匿埋之外，似乎仲可以偷取老公收喺保險箱嘅秘密。玩家可以扮演其中一個角色，亦支援多人連線，於一棟三層高嘅大宅中展開一場集解謎與潛行於一身嘅追逐。

Steam上嘅官方介紹指，遊戲會有多種不同嘅「證據」，大宅中亦有好多可以作出互動嘅傢具，每次開局大宅內嘅擺設似乎亦會唔同，增加趣味性。遊戲預計12月於Steam上市，目前售價未定。