如果你走去問一個大學生，大學期間你最好嘅老師係邊個？佢誠實嘅話就應該會答你「Wikipedia」。問題係Wikipedia以「開放式協同合作」形式運作，亦即係理論上所有人都可以編寫、修改任何內容，令內容嘅準確性存疑。就好似近日外國討論區Reddit有人發現，一名年僅19歲嘅美國少年，由12歲開始就以蘇格蘭語 (Scots) 擴寫超過27,000篇Wikipedia內容，佔成個「蘇格蘭語Wiki」將近一半。而更重要嘅係，呢位少年根本就唔識呢種語言。

話說上星期，Reddit用家Ultach於討論區中發文，話佢發現「幾乎成個」蘇格蘭語Wiki都係由同一名用戶「AmaryllisGardener」編寫，經追查後發現原來係一個住喺美國北卡羅來納州，現年19歲嘅少年，而佢自12歲開始就以蘇格蘭語撰寫Wiki內容。由於佢根本就唔識講蘇格蘭語，所以撰寫嘅內容基本上只係將英文Wiki複製過去，再將某啲字換成蘇格蘭語，仲要時不時串錯，文法亦唔啱。

你可能會諗，「既然係咁咪Delete哂佢囉！」實在亦有唔少人認為既然寫到錯哂，留啲內容喺到都冇意義。但另一邊廂，AmaryllisGardener 之所以能夠錯咗咁多年都冇人理，就係因為蘇格蘭語Wiki本身就冇咩人理，冇人睇、冇人寫、冇人改。而AmaryllisGardener呢幾年嘅「苦勞」，令蘇格蘭語Wiki成為網上最大免費蘇格蘭語內容庫之一 (雖然佢錯得好緊要)，刪除哂又好似好浪費咁。所以蘇格蘭語言中心嘅主席Michael Dempster就認為AmaryllisGardener為大眾起咗個頭，接下來由真係識蘇格蘭語嘅人去幫佢執返啱就得。

同時，AmaryllisGardener亦於Wiki上指自己並非一心做壞事，「一開始時我只有12歲，而當你細細個就開始做某啲嘢，你係唔會知道原來呢樣嘢係唔健康而且冇幫助。」佢同時亦呼籲大家唔好再網上欺凌佢，以及其家人朋友。對於啲蘇格蘭語內容，佢就話刪除哂又好、Ban咗佢個Wiki用戶又好，佢其實都唔Care。

資料來源：The Guardian