《大鐵人28》、《鐵甲萬能俠》、《三一萬能俠》呢啲經典動漫之名如雷貫耳，就算冇睇過當年播放嘅動漫，打過《機戰》都應該耳熟能詳。而近日有日本網民發現呢三部作品推出嘅週邊產品，竟然包括拐杖，就令佢哋感慨良多。

さっきイオンで見たんだけどこの年代が杖をつく時代になったのねと遠い目 pic.twitter.com/KYw5JrVV1W

— ステレオ屋2年生き延びるぞ???? (@stereoya) September 6, 2020

以《鐵甲萬能俠》為例，動畫最早於1972年年尾首播，假設當年嘅觀眾係一個10歲小朋友，亦即呢個小朋友係1962年出世，至今已經係58歲，如果以同樣方法去計1956年開始漫畫連載嘅《鐵人28》，當年10歲嘅讀者今年更加高達74歲，的確係有可能要用到拐枚嘅年紀，如果咁睇，《鐵人28》、《鐵甲萬能俠》會出拐杖做週邊都的確係合情合理。

而日本網民見到呢Set 拐杖，紛紛慨嘆時間過得太快，亦有人話，可能過多幾年到我哋呢個世代老啦，可能《美少女戰士》、《遊戲王》、《EVA》、《One Piece》、《龍珠》甚至《百變小櫻》都會出拐杖，到時老毒男就係鬥邊個碌拐杖有型啲。

實際上呢Set「昭和機械人拐杖」係由Bandai與專出老人護理用品嘅幸和製作所於2018年合作推出，售價為9,800Yen (約HK$715)，都唔平架！