好多人去日本都會租架車自駕遊，但你又有冇諗過去日本其中一個節目就係揸車？而且唔係普通A點去B點，而係去全長3.5公里嘅私人賽車場揸？等到2022年，位於東京附近、號稱「亞洲首個私人跑車會所」嘅「The Magarigawa Club」就開幕，到時大家就可以儘情競速之餘，更可於富士山及東京灣美景之下享受一個高級假日！

我知日本其實有好多不同大小嘅賽車場，但「The Magarigawa Club」係代理日本法拉利、林寶堅尼、保時捷、勞斯萊斯及賓利嘅「Cornes Motors」及「C.P.S」母公司「Cornes & Company Ltd」開設，再加上所有服務都係會員限定，一睇就知係針對有身份地位嘅人。「The Magarigawa Club」嘅賽道由Tilke Engineers & Architects設計，全長3.5公里，22個灣，最大上坡坡度為20%、最大下坡坡度為16%，包含一段800米嘅直路，會員可以揸自己車落場，會方提供恆溫車房、加油站及落場前後檢查維修外，亦會有專業賽車手一對一教授駕駛技巧。

咁「有身份有地位」嘅人，好少可會自己一條佬走去揸車，通常都係帶埋女朋友 (們) 或老婆仔女一齊去。但佢哋未必揸車架嘛？所以會內都有酒吧、餐廳、賽車主題親子休憩室、健身中心、無邊際游泳池、水療及天然溫泉等設施，甚至有寵物公園及遠足小徑，唔揸車嘅都大把嘢玩，簡直可以話係一個地點包起哂你成家人嘅活動。

「The Magarigawa Club」已於今年初動工，預計2022年落成。想知到時點入會之類呢，就要留意官網啦。