一本漫畫入面主角固然重要，但第二男主角往往係令到整個故事更加吸引的存在，佢同主角嘅互相競爭，甚至比主角實力更強亦不在話下。而日本「少年Jump」漫畫日前就選出300位第二男主角，並完成一個「最具魅力第二男主角」投票，就等我地睇下排名前五的結果。

第五名 羅賓假面 (筋肉人) 

作為主角筋肉人嘅勁敵，羅賓假面坐擁羅賓一族以及佢歷史之鎧與家族榮光，同時佢亦被視為正義超人嘅楷模，不比主角遜色。

第四名 日向小志強 (足球小將) 

其強勁嘅力量，比主角戴志偉更具攻擊力，一招猛虎射球射爆唔知幾多個波，到後來嘅雷獸射球威力有增無減，係漫畫入面最強感染力嘅前鋒，其一路以來嘅成長由自大到成熟，絕對係唔少男性嘅目標。

第三名 笛子魔童 (龍珠) 

作為故事前期嘅大反派，到後來成為主角悟空嘅好朋友，可惜後來實力已經難以再有發揮，只能夠偶意指點一下悟飯。

第二名 拳王雷奧 (北斗神拳) 

因妒忌而殺死師傅龍拳嘅雷奧，擁有至尊無上嘅實力，係故事入面嘅超級大反派，最終都係逃不過被主角殺死的命運。

第一名 比達 (龍珠) 

排名第一嘅比達，相信無乜人會有異議，其魅力有時候比主角悟空更大，特別係佢個種永遠嘅Number 2命運，但卻不斷進代自己，希望超越悟空，到布歐篇承認悟空比自己強大，實在令人佩服。同時比達熱愛自己嘅家庭，親情爆燈，當自己兒子被殺時所爆發嘅憤怒都令人震撼，可惜故事同時描寫佢好多衝動被擊敗嘅片段....

其餘排名前列的角色包括:

- 飛影(幽遊白書)

- 流川楓(男兒當入樽)

- 佐助(火影忍者)

- 齋藤一(浪客劍心)