香港戲院重開，對影迷黎講當然係好事，但大家或者都會發現，戲院係就係開返，但大家能夠揀黎睇嘅戲，尤其係荷里活大片，除咗一部《TENET》之外基本上就冇其他嘢可以揀。而呢個情況似乎都會持續好一段日子，事關即使《TENET》海外票房唔錯，但美國本土票房就非常慘烈，令電影到依家都仲蝕緊錢。

圖片：IMDB

據《Variety》報導，Warner Bros. 發行嘅《TENET》，截自上週末嘅美國本土票房只有區區五千幾萬美金，即使海外票房有2.62億，全球總票房都只係3.07億美金。而電影拍攝成本要2億美金，全球宣傳費 (仲要因為多次延期而宣傳咗好多次) 又唔會少得去邊，票房仲要同戲院拆數，簡單一句就係《TENET》到依家仲蝕緊錢。

圖片：Wikipedia

雖然話《TENET》仲可以靠VOD或者放上HBO Max等平台賺多一筆，但整體盈利效果肯定比預期相差甚遠，換言之缺乏美國本土票房支持，即使強如《TENET》都未必能夠回本，所以各大電影公司都紛紛將預計2020年尾上映嘅電影推遲，例如007系列最新作就推到下年。而又因為缺乏大作吸引觀眾入埸，美國戲院如「Regal Cinemas」有可能關閉全線500多間戲院；然後又因為戲院唔開，片方就推出新戲時就會更加謹慎；冇戲上觀眾又冇入場動力，如是者惡性循環，唔單止大家冇戲睇，更可能導致美國戲院業出現倒閉潮。