呢兩年大家應該都會覺得自己經歷緊電影劇情一樣嘅生活，而我本身都好肯定，過幾年一定會有以肺炎疫情為主題嘅電影上映——但我錯啦，原來唔使等幾年架。事關疫情都未過，已經有一部關於疫情、於疫情中拍攝、講述疫情可以有幾恐怖嘅電影拍緊，仲要唔係小製作黎架。

圖片：Entertainment Weekly

呢套名為《Songbird》嘅電影由Adam Mason執導，監制係鼎鼎大名嘅Michael Bay，演員方面有美劇《Riverdale》男主角KJ Apa、歌手兼演員Sofia Carson、甚至仲有我女神Alexandra Daddario。而故事背景就講肺炎病毒出現異變，死亡率急升至50%以上，令全球封城四年 (即係故事開始時嘅2024年)，美國人民被逼入住隔離營，而主角就係由KJ Apa飾演嘅速遞員。佢喺送貨時遇上Sofia Carson飾演嘅女主角，兩個人就以愛去應對疫情。

圖片：Entertainment Weekly

雖然故事聽落只係一般末世電影加少少《Death Stranding》元素，換轉係早兩年拍攝應該就只係一部普普通通嘅電影，但由於電影直接拎Covid-19肺炎疫情黎做主題，而且正值疫情期間拍攝，唔少人都認為套戲係炒作疫情，令人反感。目前套戲未有上映日期，但《Entertainment Weekly》就公開咗電影海報同幾張劇照，亦有電影嘅詳細報導。