大家面對現實，自從PS5出咗之後，各位PS玩家就注定係會買新機，分別只係你幾時買、幾時買到咁解。但換新機又會產生一個新問題，就係部舊嘅PS4點處理呢？掉咗佢？仲用得架喎；賣咗佢？有人買我都好蝕啦；儲起佢？邊有咁多位！

而Sony就為大家解決呢個問題——用部PS4玩PS5嘅遊戲。

圖片：Playstation Blog

嗱件事就係咁嘅：PS4年代，Sony推出咗一個叫Remote Play嘅功能，容許玩家以電話、電腦等裝置，透過互聯網連線屋企部PS4，遙距遊玩PS4上嘅遊戲，亦即係一個個人雲端遊戲服務咁啦。而Sony近日嘅一個官方Blog文中就確認，Remote Play功能將會作出更新，令玩家可以用PS4連線PS5，去玩PS5上嘅遊戲，而且更支援多人同時連接。換言之如果你買咗PS5，你部PS4就可以搬去第二間房，甚至第二間屋，再用Remote Play黎玩啦。

圖片：Google Play

如果你之前有試過用電話、電腦透過Remote Play去玩PS4遊戲，你就應該會發現延遲問題頗為嚴重，想玩動作類遊戲基本上就冇咩可能。但大家唔好唔記得iPhone 12支援5G之後，今年各個網絡供應商都會主力發展5G網絡，而5G嘅其中一個優點就係極低延遲，換言之就解決咗Remote Play嘅最大缺點。依家仲可以用PS4駁電視Remote Play PS5上嘅遊戲，有兩頭住家都唔驚呀！