因為本地肺炎疫情關係，原本於8月21日至24日舉行嘅「香港電腦通訊節」，一拖再拖暫定於明年1月21至24日舉行。

由於把關不力，疫情不斷有漏網之魚，令香港零售界及中小企陷入寒冬，甚至不少都已經結業。所以今次電腦節大會宣佈將重點推廣大量超值產品，希望為業界帶來一點曙光，同時為市民帶來更超值嘅消費。

今次入場嘅市民只要現場購票你就已經即刻抽獎，有機會獲得10-500元不等嘅現金消費券一張，咁你就有更大動力去消費啦。

而作為參展商，就梗係驚又再延遲啦，大佬比晒錢又要拖都咪話唔頭痕。所以大會宣佈特別措施協助一眾參展商。就係如果因疫情再爆發而被迫取消展覽，大會將推出110%保障措施，退返90%展位租金；將相等於今年20%租金金額（即展商餘下10%租金，大會額外贈送多10%），用於「香港電腦通訊節2021」展位租金費用。展商可享最高達20%之租金回贈；而租金亦會維持去年價格。 

當然，防疫措施都要做到足，以下就係所有入場人士都必需跟的指示:

-規定展商及參觀人士佩戴口罩 

-於會場設置紅外線體溫檢測站 

-於場內不同地點提供酒精搓手液 

-定時用消毒劑徹底清潔升降機內的顯示板、自動扶手電梯、門把手以及枱櫈 

-加強清潔及消毒會場，包括參展商攤位、場內設施及洗手間 

-加強會場內的鮮風轉換效率 

-於場內不同地點提供酒精搓手液 

-於會場當眼位置增設衞生建議提示牌，並於展會網站發佈個人衞生貼士

「香港電腦通訊節」 詳情:

日期：2021年1月21日至24日 (星期四至星期日) 

地點：灣仔香港會議展覽中心展覽廳3D & E (港鐵灣仔站A5出口) 

網址：www. hkccf-expo.com

票價：$35（1米以下小童及65歲以上長者，或持合資格「傷殘人士登記證」人士免費入場）