近期上映嘅大熱動漫《鬼滅の刃》劇場版 - 《鬼滅の刃 無限列車篇》，可以話熱爆全球，特別係日本當地就更加陷入瘋狂。而日本當地票房嘅房開畫至今，已經錄得超過233億日元，究竟黎緊有無機會挑戰日本電影票房史上嘅第一位呢?

目前，《鬼滅の刃 無限列車篇》票房為233.4億日元，排名票房榜歷史第5位，而喺佢前面嘅分別有《你的名字》、《冰雪奇緣》、《鐵達尼號》及《千與千尋》，當中《你的名字》及《冰雪奇緣》嘅票房分別為250.3億及255億，因此估計以《鬼滅》嘅氣勢要超越呢兩套動畫經典應該不成問題。

而排名更高嘅《鐵達尼號》262億及《千與千尋》嘅308億，相信《鬼滅》要登上歷史第二票房嘅難度應該就唔高嘅，但要挑戰《千尋》嘅第一寶座，就真係要睇下黎緊一週嘅票房能唔能夠保持30億日元票房啦，如果走勢依然強勁嘅話，咁今年內突破300億仍然成數好高，然後一口氣超越《千尋》亦都唔係無可能。

《鬼滅》能夠爆紅嘅原因，除左本身動畫超高質之外，其角色亦都係令人鍾情嘅原因，特別係主角炭治郎，呢位主角與其熱血漫畫嘅走向一樣由能力不足，到後來表現出色，但佢嘅性格卻異常善良，除左對妹妹嘅關愛之情，對好嘅鬼亦有一份憐憫之心，但佢並不偽善，又唔會好似《龍珠超》入面變身為「自在極意功」嘅悟空一樣只求比武，炭治郎會毫不猶豫斬殺惡鬼。

由於炭治郎咁嘅性格，成功吸引到唔少女Fans，佢地都表示想要一個咁嘅哥哥。再加上其他性格突出嘅一眾配角，最終令呢套漫畫爆紅到咁。