《Star Wars》系列一直都吸引到大量Fans，而且大家唔淨係鍾意套戲，更鍾意埋入面嘅各種物品，以至電影道具都能夠於拍賣會、二手市場上獲得高價。而最新嘅面世嘅，就有呢把來自《Star Wars: Revenge of the Sith》、飾演Obi-Wan Kenobi嘅Ewan McGregor拍攝時所用嘅光劍，預計會賣到過百萬港紙！

於電影中，呢把光劍係Obi-Wan獲得絕地大師稱號後所造，亦係佢個人第三把光劍，同時亦係佢於電影最後，與黑化嘅Anakin Skywalker對戰時所用 (I have the high ground~)。值得一提嘅係，根據設定正傳三部曲中嘅Obi-Wan (Alec Guinness爵士飾演)都係用同一把光劍 (但當然唔係同一把道具)。

而呢把道具，原本於《Revenge of the Sith》拍完後，就送咗比電影嘅劍術指導Nick Gillard，後來唔知因為咩原因而拎出黎拍賣。由於把劍嘅知名度，所以即使有部份位置有所破損，但預計都會賣到8萬至12萬英鎊 (約HK$80至120萬)。