喺香港講「芬蘭浴」或者「桑拿」，大家應該都會諗起砵蘭街啲霓虹招牌，但正宗芬蘭浴喺芬蘭黎講其實非常普遍而且正經，如果你唔想去到北歐咁遠，但又想嘆下正經芬蘭浴，「近近地」日本最近都開咗全國首間擁有個人獨立房嘅芬蘭浴。

呢間「ソロサウナtune (Solo Sauna Tune)」設於日本東京神樂坂區，店內設有個人使用嘅桑拿房，而每間房中除咗有2m見方、有自芬蘭入口桑拿炭爐嘅桑拿房之外，亦有只會出10-15度凍水嘅淋浴花曬，亦有一個小型嘅休憩區域 (其實就係一張扶手椅啦)。房間整體都採用較為昏暗嘅光線，營造出安寧嘅環境。店內亦有酒吧供大家休息。

而除咗個人房，店內亦有供最多三人使用多人房，但使用者必須係同一個性別

價錢方面，雖然依家到1月尾做緊新張優惠，但香港嘅大家應該都冇機會享用，所以我就直接講個正價出黎：個人房3,800Yen (約HK$280) 60分鐘、多人房11,400Yen (約HK845) 用70分鐘。未夠十八歲以上人士不准使用，但小童就可以跟住同性父母入內。