聖誕將至今年假期宅居打機成為節日最強活動，因此PlayStation 5成為最潮貨品 。亦因為咁PS5 搶劫事件層出不窮。尤其係近來為人詬病話治安麻麻的英國，據泰晤士報披露，今年 9 月以來英國發生至少 27 單貨車搶劫案，盜竊集團鎖定以 PlayStation 5為首要目標再加上電視、手機、化妝品等等奢侈品下手搶掠，再變賣賺取暴利。當中主力夾攻物流貨車以「rollover」方法幾架車包夾物流貨車再排一架靠近貨車後方撬開車門或以切割工具闖入，再將全部目標PS5扔回接應的賊車。據聞英國警方已加強應對，而我建議Sony出貨運輸PS5應動用解款車。

話說據泰晤士報訪問一名職業罪犯的透露，因為物流貨車通常無咩防範措施，且大多數駕駛員只係打份工唔會搵命博守護貨物，加上無受過相關應對培訓。故此盜竊集團睇中目標車輛實行包抄搶劫可謂十拿九穩，貨車因此成為盜竊集團首選，如果架貨車大大隻字印住Sony PlayStation 5，唔搶你搶邊個？上個月智利都有一整車PS5貨車全部被搶劫。

不過就算你唔係做物流，自己網上訂購都可能出事，因為早前已有好幾單外國人上網Amazon 買PS5，最後到手貨物懷疑運輸途中被狸貓換太子，將PS5變成氣炸鍋貓糧甚至紙巾等九唔搭八嘅嘢 。都係個句，訂購PS5過快樂嘅Lonely Christmas搵護衛公司解款車運送就萬無一失 。仲有網購開箱最好同步錄影存證，保障自己消費權益。