自從Space X成功之後，人類與太空之間嘅距離似乎就近咗好多，連Tom Cruise都話黎緊會上太空拍戲，成為全球第一套「太空實景」電影——不過究竟做唔做到「第一」就要問下俄羅斯，因為最新消息就話俄羅斯想搶頭啖湯黎飲！

圖片：Channel One

據《Sky News》報導，俄羅斯聯邦航天局 (Roscosmos)將與Channel One合作拍攝一部名為《Challenge》嘅電影，最快會於明年十月就真係上國際太空站開拍。而目前俄羅斯聯邦航天局就公開招募緊女主角人選，佢哋話女主角唔需要有演戲經驗、當然亦唔需要上過太空，但就必須係俄羅斯人、年齡介乎25到40歲、身高150cm-180cm、體重50-70kg，而且上圍不能大過112cm——相信係因為太空衣嘅限制。另外對體能亦有一定要求，包括3分半鐘跑1km、20分鐘游800米、以及能夠於三米彈板上跳水。當然選中之後都要經過多個月訓練先可以上太空。

至於套戲本身，目前就未知太多詳情。《Sky News》引述Channel One CEO Konstantin Ernst指，套戲「唔係科學小說，而係真正會於未來發生嘅事」，據報到時就會於國際太空站拍攝10日。

值得一提嘅係Tom Cruise嘅太空電影同樣預計會於明年10月上國際太空站拍，唔知到時會唔會喺太空相遇呢？