- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| 聽日連正月十五都過埋，由上年年尾數到而家，咩嘢大時大節都過晒，做game班友係時候開工啦！的確，大家悶咗咁耐，等到呢個3月，終於多番幾隻似樣啲嘅game可以玩。早幾日PlayStation就搞咗個預覽會，畀傳媒試玩咗幾隻會喺3月入面推出嘅大作，我就覺得以下呢4隻最值得玩，Gentlemen都睇吓啱唔啱心水啦！ | |
| |
| 爭地盤前傳 《人中之龍 0 誓約的場所》 老老竇竇，雖然上集《人中之龍維新！》回到坂本龍馬個時代有新鮮感，打鬥動作亦都夠勁夠爽，但係我始終鍾意現代背景多啲，起碼總會有番啲露肉囡囡睇吓先，唔係之前啲宣傳邊有請AV女優嚟坐陣呀，大家話係咪先？所以今集《人中之龍 0 誓約的場所》嘅背景設定番喺1988年嘅東京同大阪，啱我！ 今次我試玩咗部分《桐生篇》，大部分時間都係用咗去睇劇情，埋牙打嘅時間唔多，不過都體會到同上幾集係有明確分別。最主要亦都係最正嘅一點，係打嗰陣有3種能力取向變化，啲名直譯就係「幹架師」、「舞者」同「強打者」，直接講就係標準型、速度型同力量型能力，可因應唔同敵人同場景，揀番最有利嘅能力去應戰。不過我最鍾意都係用「強打者」，貪佢攻擊範圍夠大，用起道具上嚟都勁啲。同埋整體嚟講，打鬥都算易上手，兼且過程好流暢。 值得讚嘅，仲有呢集嘅畫面明顯畫得更仔細，尤其係啲街道背景，連啲勁細微嘅details都做足晒。不過今次試玩仲未見到據講係照住李璨琛嚟畫嗰個角色「老鬼」，未知畫得似唔似。一句到尾，呢集既然係前傳，而且5月會出埋中文版，好啱冇玩過前作嘅人開始玩呢個系列。 | |
| |
| 值玩度：4/5 平台：PS4（另有PS3版） 類型：動作冒險 推出日期：3月12日（日文版）、5月14日（中文版） 售價：待定 | |
| |
| 真正千人斬 《One Piece海賊無雙3》 先講結論：今集《海賊無雙3》，fans一定要玩！點解？第一，呢個系列首次登陸PS4，畫面靚咗流暢咗係小事，最重要係憑住PS4嘅效能，一個畫面可以放多好多敵人，真正達到「千人斬」嘅境界。第二係今集唔用原創故事，用番原著劇情嚟做背景，有番親切感同投入感，玩落開心好多喎！ 好！實際試玩先！試玩版除咗有路飛同羅兩個原有角色外，仲有新增嘅藤虎揀，咁梗係試佢啦！佢把杖刀真心勁，睇落攻擊力真係勁過路飛同羅，所以面對「千人斬」都唔算難玩。仲要提嘅係，今集加入咗一個新嘅「羈絆突擊」系統，只要儲夠氣，就可以call多個同伴角色出嚟一齊出連鎖攻擊，幫到手殺敵當然正，但最正其實係畀到其他角色多啲出鏡，fans最鍾意咪呢啲囉！ 值玩度：3.8/5 平台：PS4（另有PS Vita版） 類型：動作 推出日期：3月26日（日文版） 售價：待定 | |
| |
| 喪屍更核突 《RESIDENT EVIL Revelations 2》 經初步試玩，雖然我仍然覺得隻game係「幻覺嚟啫，嚇我唔到嘅」，不過客觀講句，今集嘅氣氛的確比上集做得更恐怖，至少啲喪屍核突過上集嗰啲先，就算嚇唔到人，都能夠令人側目！ 而我最鍾意係呢集玩緊嗰陣，想從舊主角Claire Redfield同新角色Barry Burton兩人之間轉換嘅話，只要㩒個掣就得，算幾方便。事關Claire Redfield繼續被設定為用槍射喪屍，Barry Burton就係負責用特別道具去解謎過關，所以經常要將角色轉嚟轉去，若然好麻煩先轉到，玩落實好掃興。 值玩度：3/5 平台：PS4（另有PS Vita、Xbox One、Xbox 360及PC版） 類型：動作冒險 推出日期：3月19日（中文版） 售價：$278 | |
| |
| 劈得考技術 《Bloodborne》 喺更早一次PlayStation試玩會入面，筆者已經請過Game迷「一姐」Kali評過呢隻PS4獨佔打怪物game，各位不妨再睇睇佢嘅意見。 一姐Kali評 2015初PS4 3大獨佔作 值玩度：4/5 平台：PS4 類型：動作冒險 推出日期：3月24日 售價：$398 | |
COMMENT
KEYWORD