Google旗下專門研發先進自動駕駛系統的子公司Waymo CEO John Krafcik日前受到英國金融時報訪問，講到Waymo全自動駕駛系統時表示自動駕駛長遠而言會顛覆私家車的概念，佢預測現時出世的新世代嬰兒，大個之後根本唔需要學揸車，佢話有100%信心，未來年青人唔再需要駕駛執照！如果真係咁樣唔好話棍波定自動波，你個仔大個可能連開車門都唔識(唔係自動會開的嗎？)

呢位全力研發自動駕駛技術的Waymo CEO John Krafcik同時講到全面開展自動駕駛車研發測試係一件痛苦的工作，要成功做自動駕駛比將火箭發射入地球軌道更具挑戰性，原因係全球的乘客需要不停確保車輛行駛的安全性，絕對唔可以有危險。不過佢就堅信，AI全自動駕駛好快就會成為主流， 誓將會改變汽車產業完全變革私家車概念。所以佢肯定咁講，細路！你地完全唔駛再學揸車，車係會自動駕駛！

Waymo公司 自 2020 年 10 月 8 日起開放美國亞利桑那州鳳凰城畀一般民眾使用的全自動駕駛Call車服務。根據公司 2020 年 10 月 30 日白皮書資料，Waymo 於 2019 年係亞利桑那州透過有受訓練車輛操作員跟車監視進行 610 萬英里自動駕駛路面里程，2019~2020 年前 9 個月仲包括另外 65,000 英里的完全自動駕駛（第四級自駕等級）里程數。Waymo 表示此等數據相當於美國一般有車牌的經驗駕駛者 500 年的經驗值。

講講呢間公司，首先係人都識的Google旗下有間Alphabet Inc. 再旗下就擁有自駕車子公司 Waymo 。呢間公司專門開發全自動駕駛系統，並曾經募得大量資金投資全力開發！根據《自動駕駛車：機遇，策略和衝擊》（Autonomous Vehicles: Opportunities, Strategies, and Disruptions）一書作者 Michael McGrath 係上年年底撰文指出「自動駕駛乘車服務（ARS）／Mobility as a Service（MaaS）／全自駕計程車」預估將會係 2025 年全面投入服務並將囊括美國共乘市場 35.29% 市場佔有率，屆時將有 5~7 間 自動駕駛乘車服務ARS 供應商競爭。作者McGrath仲表示，蘋果（Apple Inc.）據傳將推出的自駕車應該都係瞄準 ARS 市場商機。佢預估2025 年美國 ARS 市場產值將會高達 750 億美元。而今年係2021年即四年之後轉眼就見的事。

未來就在現在，如果你未有車牌，唔駛考啦，反正而家都無期你考，等住Call自動駕駛車，如果你而家手上有好多的士牌，平平地幾皮放畀我吧啦！