據外媒《The Hollywood Reporter》獨家報導，有消息人士指WarnerMedia旗下HBO Max高層已經搵咗多位編劇討論，傾下點樣將《哈利波特》呢套經典人氣作品變成劇集，但仍然只係好前期嘅討論階段，十劃都未有一撇。

由Daniel Radcliffe飾演嘅Harry Potter經典圓框眼鏡形象深入民心。（圖片：imdb）

雖然有消息指HBO Max同Warner公司高層為《哈利波特》系列劇集搵緊編劇，但目前尚未搵到合適人選，以及只係前期構思階段，所以無達成任何交易。而HBO Max同Warner就透過聲明向《The Hollywood Reporter》表示，工作室或串流平台並無製作《哈利波特》系列劇集。

《怪獸與牠們的產地》係《哈利波特》系列前傳電影，口碑都唔錯。（圖片：imdb）

儘管官方已澄清有關消息，但確實值得關注。其實考慮到Warner擁有《哈利波特》呢個大IP（Intellectual property），傳出有關製作《哈利波特》系列劇集消息並唔意外。話曬JK羅琳七部《哈利波特》小說改編成八部電影後，全球票房共收入77億美元。Warner仲發行咗兩部前傳系列《怪獸與牠們的產地》，而第三部亦將會喺出年上映，Warner又點會放過呢個賺錢機會呢。但《哈利波特》原班底演員都從小朋友長大成人，如果要拍電視劇又想拍得好睇，真係需要唔少時間物色演員及編劇人才，否則拍套爛片出嚟對Warner同觀眾都唔係一件好事。