大家第一部Game Boy係邊部？要用4粒電嘅大牛龜，定係已經好後期有彩色MON嘅Game Boy Color？當年玩Game Boy都唔知用左幾多粒AA電，分分鐘多過依家啲後生成世人嘅使用量。Game Boy承載著唔少人好多童年回憶，可能大家第一次買COCO就係為左睇寵物小精靈攻略，仲有好多經典遊戲都非常難忘，但就唔係到盡錄啦。

經典遊戲帶包裝再現，記得玩之前要吹下餅帶先插入去。（圖片：KICKSTARTER）

回歸正題，最近外國有個獨立遊戲工作室Green Boy Games開發緊一隻Game Boy遊戲《The Shapeshifter》，表示希望將Game Boy精神傳承落去。喺著名眾籌平台「Kickstarter」籌旗，可能對一眾老鬼實在太吸引，好快就籌夠數，仲比原定目標（6,000歐元）多出兩萬幾歐元，共籌得約26,000歐元。

根據官方遊戲劇情介紹，玩家將會扮演主角Elliot，同好朋友一齊上山渡過週末，大家夜晚喺篝火旁露天入睡。點知半夜突然驚醒，遇到了一隻小精靈向你求救，希望你可以幫佢嘅朋友。小精靈會賦予你一個能力，令你變成任何你掂過嘅動物，但呢個能力係天光嗰陣就會消失。

呢部野真係食電食到黐線，用4粒AA電都算，仲要玩一陣就無曬電。

聽落好似非常吸引，話曬任天堂已經好多年無喺Game Boy出新Game，等我喺床下底搵返塵多年嘅Game Boy先（都唔知開唔開到機）。