受疫情影響，全球各地多間電影院關閉，好幾部巨作遭延期，或選擇透過串流平台上映。《007：No Time to Die》最初原定2019年11月上映，由於製作途中導演Danny Boyle產生分歧唔撈，搞到要重寫劇本，再加上疫情問題，最終延期至今年10月8日上映。

「007」系列除咗有邦女郎，另一個特色就係大量植入式廣告，每次都可以睇到James Bond用最新手錶、手機揸埋部最新款超跑儆惡懲奸，非常有男人味。所以一向有唔少大品牌會同「007」合作或贊助，小至西裝、錶、手機，大至車、飛機、遊艇都有。但《007：No Time to Die》已經延期接近兩年，入面唔少產品已經過時，近日有消息指如果再延期有機會要重拍某啲鏡頭，如果要重拍意味著又要拖更耐先上映。

片中所用手機為Nokia 8.3 5G

錶、汽車、衫都可以話唔驚咁快過時，但《007：No Time to Die》所用嘅手機Nokia 8.3 5G就有啲尷尬，當10月上映嗰陣，部電話就出咗差唔多一年。當觀眾見到成身高科技產品嘅「007」都要用過氣產品，你都咪話唔搞笑。不過我相信如果唔係Out到用2-3年前手機，大部份觀眾應該唔會太在意，但贊助商點諗就唔知啦，話曬畀咗咁多錢，無理由用嚟宣傳上代產品。