近期《鬼滅之刃》有幾hit唔使多講，熱潮橫掃動漫電影市場，擊敗《千與千尋》打破日本影史票房記錄，同時衍生各式各樣周邊產品，乜嘢加個鬼滅落去都會好賣啲，睇落「吸金」力大過其他曾喺《週刊少年Jump》連載過嘅經典漫畫，例如龍珠、海賊王、男兒當入樽等。

據《週刊女性PRIME》報導，「集英社関係者」透露原來《週刊少年Jump》連載過嘅作品入面，最賺錢唔係上面所講任可一部，而係「遊☆戯☆王」！

文中表示遊戲王漫畫單行本銷量雖然只有4000萬冊，只有鬼滅三分之一，唔夠海賊王十分之一，但遊戲王唔係單靠賣漫畫賺錢，重點在於遊戲王開創嘅卡牌遊戲。遊戲王卡牌被健力士世界記錄認定為「世界銷售最多的交換卡片遊戲」，雖然目前無確實數據統計賣咗幾多張，但根據2011年累積發行量252億張嚟推算，現時已經賣出大約350億張，以平均一張售價30円咁計嘅話，卡片銷售額已經破一兆円（約743億港幣），絕對係天文數字。文中順帶提到，作者高橋和希每張卡只抽成0.1~0.2円，計起上黎，單係賣卡都最少有35億円收入…