大家仲記唔記得細個睇完《咒怨》，係咪嚇到連去廁所沖涼都唔敢，就連瞓覺都怕會有個細路喺被竇度捐出嚟望著你？繼《犬鳴村》後，日本恐怖大師清水崇再次以真實靈異景點同都市傳說做題材拍恐怖片，預計今年2月5日喺日本上映，至於香港幾時上就都係嗰句，等下啦。

如果有睇開日本都市傳說，對自殺勝地青木原樹海（又稱為自殺森林）絕對唔會陌生。青木原樹海位於富士山西北側山麓，充滿多種幾十米高嘅大樹，所以樹海入甚少見到陽光及非常潮濕。每年唔少人選擇去嗰度輕生，經常可以喺入面發現遺體，樹海入口更有標語提醒訪客珍惜生命。更有市傳說話進入樹海後指南針會失靈，加上環境氛圍影響，好容易令人當失路或自尋短見。

《樹海村》除咗以青木原樹海為背景，更用到另一個日本經典都市傳說「取子箱（コトリバコ）」。「取子箱」出自於日本討論區2ch，指日本坊間流傳一種詛咒道具，施咒者將死嬰放入面一個大約20cm嘅正方形木箱後密封，再送畀想詛咒嘅人，收到嘅人就被咒死屋企所有女人同小朋友，需要將木箱送去神社或寺院經長年鎮壓先可以將詛咒威力減少。

今次清水崇一次過將真實靈異地點及經典都市傳說融合，創作電影《樹海村》。以清水崇嘅恐怖片拍攝功力，加上都市傳說加持，應該會嚇到鼻哥窿都無肉。