講到蝙蝠俠，大家第一時間可能諗起由Christopher Nolan執導嘅「蝙蝠俠三部曲」，又或者係1989年由Michael Keaton飾演嘅蝙蝠俠。其實90年代第三部蝙蝠俠電影《Batman Forever（新蝙蝠俠─不敗之謎）》都唔差，最近本地著名玩具品牌Hot Toys就以當年造型製作蝙蝠俠及羅賓 1:6 Figure，重現經典。

唔知大家仲記唔記得《Batman Forever》嘅劇情，雙面人同謎語人發現蝙蝠俠身份後，就去咗Bruce Wayne屋企摧毀大部分裝備，當中包括蝙蝠俠初登場時所著嘅戰衣。Hot Toys 今次重現 Alfred Pennyworth為Bruce Wayne預備嘅第二件聲納戰衣造型，塑造高約32cm，具有30個活動關節嘅1:6 Figure。以壓印技術充分還原戰衣紋理細節，標誌性黑色斗篷採用更具質量嘅布料製作，結合出色塗裝技術呈現金屬顏色。

配件方面就有四款武器，一個可以裝喺右手手臀上嘅索勾槍、一個可以裝係右手手背嘅索勾槍、一個蝙蝠飛標同埋一個水底推進器。

喺電影入面雜技人Dick Grayson屋企人被雙面人殺死後，Bruce Wayne就邀請佢做護衛，最後隨劇情推演變成羅賓。由於曾經係雜技團成員，所以戰服配有紅色同綠色原素。Hot Toys 按羅賓高度如實還原戰衣造型，製作一個約30cm高，具有30個活動關節嘅1:6 Figure。細致還原羅賓肌肉線條，左胸有象徵羅賓嘅R字圖案，手套配有爪鉤。

《Batman Forever》蝙蝠俠 (聲納戰衣) 1:6零售價為$1,580，而羅賓1:6零售價為$1,530，兩者預計今年第2至3季推出。